हेटौंडा–४ स्थित ओम्याक्स सिनेमा हलमा लागेको आगो नियन्त्रणमा आएको छ । आगलागीबाट हलभित्र रहेका सबै सामग्रही जलेको प्रहरीले जनाएको छ ।

बिहान करिब साढे नौ बजेबाट भएको आगलागी दुई वटा दमकल प्रयोग गरी नियन्त्रणमा लिएको मकवानपुर प्रहरी प्रमुख एसपी बुद्धि गुरुङले बताए । साढे दुई घण्टाको प्रयासपछि आगो निभाउन सफल भएको हो ।

आगलागीबाट हलका प्राय सबै सामग्रीहरु नष्ट भएका छन् । आगलागी नियन्त्रणको लागि हेटौंडा उपमहानगरपालिका र नेपाल आयल निगम अम्लेसगञ्ज डिपाको दुई वटा दमकल प्रयोग गरिएको थियो । हलमा बिहानको फिल्म शो नरहेकाले मानवीय क्षति भने नभएको प्रहरीले जनाएको छ ।

हलको पर्दाबाट आगलागी सुरु भएको हलका कर्मचारीहरुले बताएका छन् । आगो नियन्त्रणमा लिन जनपथ, शसस्त्र प्रहरी र नेपाली सेना परिचालन गरिएको थियो । आगलागीबाट भएको क्षतिको एकिन बिवरण भने आउन बाँकी छ । तर एक करोड रुपैयाँ बढिको क्षति भएको अनुमान छ । आगो करिब तीन घण्टापछि नियन्त्रणमा आएको हो ।