३ नम्बर प्रदेश प्रहरी कार्यालय हेटौँडाको क्षेत्रीय अनुसन्धान समूहबाट खटिएको प्रहरी टोलीले एक फरार ब्यक्तिलाई पक्राउ गरेको छ ।

अपहरण तथा शरीर बन्धक मुद्दामा संलग्न भई प्रहरीको मोष्ट वान्टेड सूचीमा समेत रहेका प्रतिवादी बकैया गाउँपालिका वडा नम्बर ४ बस्ने दुधबहादुर लोलाई (घट्टघरे कान्छा)लाई पक्राउ गरेको हो ।

काठमाण्डौं कुलेश्वरका प्रमोद चौधरीको छोरा अपहरणमा संलग्न भई बिगत ६ बर्ष देखि फरार रहेका ४२ बर्षिय लोलाई क्षेत्रिय अनुसन्धान समूहका प्रहरी निरीक्षक रोशन थापाको कमाण्डमा खटिएको प्रहरी टोलीले पक्राउ गरेको ३ नम्बर प्रदेश प्रहरी कार्यालय हेटौँडाले जनाएको छ ।

वि.सं. २०६९ फागुन २१ गते काठमाण्डौंको कालिमाटीका प्रमोद चौधरीको १७ बर्षिय छोरा सोनु चौधरीको अपहरणमा संलग्न भएका लो को अन्य अपराधजन्य कार्यमा समेत संलग्नता देखिएकोले सो सम्बन्धमा थप अनुसन्धान भैरहेको प्रहरीले जनाएको छ । पक्राउ पर्ने डरले लो आफ्नो घरमा नबसी अर्काको घरमा लुकिछिपी बसिरहेको अवस्थामा पक्राउ परेका हुन् ।