जब टम्पले नेपाललाई ‘निप्पल’ भने..
गुगलपाटी संवाददाता अमेरिका
आफ्नो गैरजिम्मेवार अभिव्यक्तिको कारणले बारम्बार विवादमा आइरहने अमेरिकी राष्ट्रपति डोनाल्ड ट्रम्पले नेपालको पनि उच्चारण बिगारेर बोलेको खुलासा भएको छ ।
राजनीतिक समाचार प्रकाशन गर्ने अमेरिकी पोर्टल पोलिटिकोले यस्तो खुलासा गरेको हो । पोलिटिकोका अनुसार ट्रम्पले गत वर्ष भारतीय प्रधानमन्त्री मोदीसँग भेटवार्ता गर्नुअघि तयारीको क्रममा नेपालको उच्चारण बिगारेर ‘निप्पल’ भनेका थिए ।
पोलिटिकोले गत सोमबारमा प्रकाशित गरेको रिपोर्टमा ट्रम्पले मोदीसँग ह्वाइटहाउसमा भएको भेटमा नेपालको नक्सा हेरेर नाम उच्चारण गर्ने क्रममा ‘निप्पल’ भनेको स्रोतलाई उद्धृत गर्दै लेखिएको छ । जसले अर्कै अर्थ दिन्छ ।
त्यस्तै, उनले अर्को दक्षिण एसियाली देश भुटानलाई भने ‘बटन’ भनेको पनि पोलिटिकोले उल्लेख गरेको छ ।
उनले केही समय हाइटी, एलसाल्भाडोर र केही अफ्रिकी देशहरुलाई इंगित गर्दै ‘सिटहोल’ भनेका थिए । जसले धेरै विवाद निम्त्याएपछि उनले ट्विटरबाट माफी मागेका थिए ।
सोमबार प्रकाशित पोलिटिकोको रिपोर्टमा ट्रम्पको कुटनीतिक त्रुटीहरुको सूची नै राखिएको छ । जसमा उनको अजिब हर्कतहरु र भद्दा चुटकिलाहरु पनि समावेश छन् ।
उनले एकपटक भारतीय प्रधानमन्त्री मोदीको लागि आफूले जोडी खोजिदिने भनेर पनि व्यङ्ग्य गरेका थिए । उनले एक अवसरमा हिन्दी लवजको नक्कल गर्दै भारतीय प्रधानमन्त्री नरेन्द्र मोदीको मजाक समेत उडाएका थिए ।
त्यस्तै उनले धेरै विश्व नेताहरुलाई मध्यरातमा फोन गर्ने गरेको पनि स्रोतलाई उल्लेख गर्दै पोलिटिकोले लेखेको छ ।
ट्रम्प निकट स्रोतलाई उद्धृत गर्दै पोलिटिकोले लेखेको छ, ‘कसैलाई फोन गर्न मन लागेमा उनी तत्कालै फोन लगाउँछन्, उनी समय कति भएको छ वा कसलाई फोन गर्दैछु भन्ने कहिल्यै पनि सोच्दैनन् ।’
ह्वाइट हाउसका एक अधिकारीले भने ट्रम्पले कहिल्यै पनि नेपाल र भुटानको उच्चारण नबिगारेको दाबी गरेका छन् । राष्ट्रिय सुरक्षा परिषदका एक अधिकारीले पनि ट्रम्पले आफूलाई उच्चारण गर्न नआउने शब्द र नामहरुलाई त्यत्तिकै छोडिदिने बताएका छन् ।
तर, बैठकमा उपस्थित अरुले भने ट्रम्पले नेपाल र भुटानको नाम उच्चारण गर्दा त्रुटी मात्रै नभएको बताएका छन् । पोलिटिकोका अनुसार उनीहरुले राष्ट्रपतिलाई नेपाल र भुटान कहाँ छन् भन्ने बारेमा पनि थाहा नभएको बताएका छन् ।
‘उनले यी दुवै भारतको हिस्सा होलान् भनेर सोचेका थिए,’ बैठकको बारेमा जानकारी दिँदै एक व्यक्तिले भने, ‘उनलाई यी अन्य देशको बिचमा यो के चीज हो भन्ने लागेको थियो ।’