देशका विभिन्न जिल्लामा रहेका स्थानीय तहहरुले लगाएको करको बिषयमा चर्का आलोचना भइरहँदा मकवानपुरको मनहरी गाउँपालिकाले भने गर्भवतीको स्वास्थ्य सुधारमा लगानी गरेको पाइएको छ ।

नेपाल सरकारले उपलब्ध गराउने सुविधाहरुसँगै मनहरी गाउँपालिकाले समेत थप्दा कूल ६ हजार ५ सय रुपियाँ बराबरको सुविधा सुत्केरीले पाउँछन् । त्यसका लागि सरकारी मापदण्ड भने पूरा गर्नुपर्नेछ । मनहरी गाउँपालिकाले जनाए अनुसार गाउँपालिकाभित्र बसोबास गर्ने गर्भवतीको गर्भजाँचदेखि सुत्केरी भइसक्दा ६ हजार ५ सय रुपियाँ बराबरको नगद र जिन्सी सहयोग सामग्रीहरु पाइनेछ । गाउँपालिकाले उपलब्ध गराएको सूचना अनुसार नेपाल सरकारले तोके अनुसार सरकारी स्वास्थ्य संस्थामा नियमित रुपमा ४ पटक गर्भजाँच गराएमा गर्भवतीलाई ८ सय रुपियाँ नगद प्रदान गर्छ । त्यसैगरी प्रसुति यात्राखर्च भनेर नेपाल सरकारले २ हजार रुपियाँ पनि नगद प्रदान गर्छ । ९ सय रुपियाँ बराबरको न्यानो झोला र ८ सय रुपियाँ बराबरको शिशुहरुको कपडा सेट समेत नेपाल सरकारले ब्यहोर्दै आएको छ ।

नेपाल सरकारले ब्यहोर्ने सुविधाहरुबाहेक मनहरी गाउँपालिकाले गत आर्थिक बर्षदेखि नै केही सुविधाहरु थप गरेको थियो । चालू आर्थिक बर्षमा अझै सेवाहरु थप गरेर गर्भवती र शिशुको स्वास्थ्यप्रति स्थानीय सरकारले प्राथमिकता दिएको गाउँपालिका अध्यक्ष एकराज उप्रेतीले बताए । गाउँपालिका अध्यक्ष उप्रेतीका अनुसार थपिएका सुविधाहरुमा स्थानीय मनहरी प्राथमिक स्वास्थ्य केन्द्र, हेटौँडा अस्पताल र हाँडीखोला स्वास्थ्य चौकीमा सुत्केरी गराउन लैजाँदा लाग्ने एक हजार रुपियाँ बराबरको एम्बुलेन्स खर्च गाउँपालिकाले ब्यहोर्नेछ । त्यसैगरी गर्भजाँच गर्न आउँदा ७ सय रुपियाँ बराबरको गर्भवती पोषण प्याकेट र सुत्केरी भइसकेपछि एक हजार रुपियाँ बराबरको पोषण प्याकेट उपलब्ध गराउने गरी बजेट बिनियोजन गरिएको गाउँपालिका उपाध्यक्ष मनिला बिष्टले बताइन् । यसका लागि सरकारी स्वास्थ्य संस्थामा नै गर्भजाँच र सुत्केरी गराउनुपर्नेछ ।

त्यसैगरी मनहरी गाउँपालिको मनहरी प्राथमिक स्वास्थ्य केन्द्र र हाँडीखोला स्वास्थ्य चौकीमा सुत्केरी हुन आउने गर्भवतीका आफन्तलाई बस्न, सुत्न र भात पकाएर खुवाउनका लागि आबश्यक व्यवस्था मिलाएको छ । गाउँपालिकाको सहयोगमा ग्याँस, भाँडाकुँडा र ओढ्ने ओछ्याउने समेत व्यवस्था गरिएको मनहरी गाउँपालिका स्वास्थ्य संयोजक टिकाराम अधिकारीले बताए । अधिकारीका अनुसार बार्षिक ६५० जना सुत्केरीले यो सुविधा प्राप्त गर्नेगरी बजेट बिनियोजन गरिएको छ ।