गौर नगरपालिका ४ स्थित टिकुलिया घाटमा शनिबार भएको डुंगा दुर्घटनामा मृत्यु हुनेको संख्या ४ पुगेको छ । घटनास्थलबाट ८ किलोमिटर दक्षिण भारतीय भूमिमा सोमबार थप दुईको शव भेटिएको हो । अझै एक जना बेपत्ता छन् । उनको खोजी भइरहेको छ ।दुर्घटनामा बेपत्तामध्ये टिकुलियाकी १० वर्षीया उस्मा पटेल र डुंगा सहचालक ओमप्रकाश चन्द्रवंशीको शव भारतको शिवघर जिल्लास्थित जमुआ घाटमा भेटिएको प्रमुख जिल्ला अधिकारी गोविन्दप्रसाद रिजालले बताए । ‘भारतीय र नेपाली सुरक्षाकर्मीले खोजतलास गर्दा पटेल र चन्द्रवंशीको शव फेला परेको हो,’ उनले भने, ‘बेपत्ता टिकुलियाकै इन्दुदेवी पटेल अझै भेटिएकी छैनन् ।’ उनको खोजी भइरहेको छ ।घटना भोलिपल्ट भारतीय सीमासुरक्षा बलले बगाएर बेपत्तामध्ये टिकुलियाकी ५० वर्षीया शान्तिदेवी र औरैयाकी रुनादेवी पटेलको शव फेला पारेको थियो । घटनामा ५ बेपत्ता थिए । ४ को शव भेटिएको छ । भारततीय सुरक्षाकर्मीले हराइरहेका नेपालीको खोजतलासमा निरन्तर सघाइरहेका छन् । सोमबार खोजतलासका लागि नेपाली सुरक्षाकर्मी टोली भारत गएको थियो ।