तोङ्ग ईल मोदो संघ मकवानपुर शाखाको आयोजनामा दुई दिने स्पेशल टेक्निक सम्बन्धी वर्कशप तथा बेल्ट प्रमोशन मंगलबार हेटौँडामा सम्पन्न भएको छ ।

भदौ ११ गते र १२ गते सम्पन्न कार्यक्रममा १२ जना खेलाडीहरुको बेल्ट प्रमोसन समेत गरिएको थियो । वर्कशपमा तोङ्ग ईल मोदो महासंघ नेपालका वरिष्ठ उपाध्यक्ष तथा अन्तराष्ट्रिय प्रशिक्षक प्रकाश श्रेष्ठले प्रशिक्षण दिएको कार्प मकवानपुरका संयोजक सुवाश लामाले जानकारी दिए । वर्कशपद्वारा मकवानपुरमा तोङ्ग ईल मोदो खेलको विकास गर्ने उदेश्यले कार्यक्रम गरिएको आयोजकले जानकारी दिएको छ ।

के हो तोङ्ग इल मोदो ?

तोङ्ग ईल मोदो (द ओए अफ युनिफाईड मार्सल आर्टस्) शान्तिको लागि खेल भन्ने मुल मान्यताका साथ खेलिने खेल हो । यो खेल नेपालको २५ वटा जिल्लामा दर्ता भएर खेलाईन्छ भने अहिले ४० वटा जिल्लामा विकास र विस्तार भइरहेको छ । त्यस्तै विश्वमा ४० वटा देशमा यो खेल हुने गरेको छ । नेपालमा २०६९ सालमा नेपाल राष्ट्रिय खेलकुद परिषदमा १२८ नम्बरमा दर्ता भएको यस खेलको माग देशको ७७ वटै जिल्लामा भइरहेको छ ।

यो खेल विश्वमा खेलिने खेलहरुको परिस्कृत, समय सान्दर्भिक र वैज्ञानिक कलालाई समायोजन गरेर मार्सल आर्ट स्थापनाको मौलिकतालाई थपेर बनेको खेल हो । शान्तिका लागि खेल, स्वास्थ्यका लागि खेल र राष्ट्रको लागि खेल भन्ने उदेश्यको साथ खेलिने यो खेल विशेष गरी युवाहरुलाई नैतिकवान, चरित्रवान, जीम्मेवार नागरिक, स्वस्थ र सभ्य व्यक्ति बनाउन सफल भइरहेको खेलका प्रशिक्षकहरु दाबी गर्छन् । साथै यस खेलबाट राष्ट्रिय तथा अन्तर्राष्ट्रिय जगतमा भएका प्रतियोगितामा खेलाडीहरु नेपालबाट सहभागी गराएर राष्ट्रको लागि गर्व र सम्मान स्वरुप पदकहरु जित्दै आईरहेको समेत उनीहरु बताउँछन् ।