मकवानपुर प्रहरीले लागूऔषधसहित आइतबार २ जनालाई पक्राउ गरेको छ । प्रहरी चौकी बसपार्क हेटौंडाबाट खटिएको प्रहरी टोलीले लागूऔषधसहित २ जनालाई पक्राउ गरेको हो ।
पक्राउ पर्नेमा मकवानपुरको ईन्द्रसरोवर गाउँपालिका वडा नं ५ की २६ वर्षीया श्रृजना लामा र सर्लाही परवानीपुरका २७ वषीय भरत मगर रहेको जिल्ला प्रहरी कार्यालय मकवानपुरले जनाएको छ । श्रृजनाको साथबाट लागूऔषध डाईजिलेब ४८ एम्पुल, ब्युनोर्फिन ४८ एम्पुल, फेनारगन ४८ एम्पुल र भरतबाट डाईजेलेब २४ एम्पुल, ब्युनोर्फिन २४ एम्पुल, फेनारगन २४ एम्पुल बरामद गरिएको जिल्ला प्रहरी कार्यालय मकवानपुरका प्रहरी नायब उपरिक्षक नरेशकुमार सिंहले बताए ।
पक्राउ परेका २ जनालाई जिल्ला अदालत मकवानपुरबाट ५ दिनको म्याद अनुमति लिई आवश्यक अनुसन्धान तथा कारवाही भैरहेको प्रनाउ सिंहले बताए ।यसैबीच अवैध रुपमा नदीजन्य पदार्थ (बालुवा, ढुङ्गा,गिट्टी) ढुवानी गर्ने २ वटा ट्याक्टरलाई मकवानपुर प्रहरीले नियन्त्रणमा लिएको छ । हेटौंडा उपमहानगरपालिका वडा नं १ स्थित सडकखण्डबाट अवैध रुपमा नदीजन्य पदार्थ लोड गरेको २ ट्याक्टरलाई प्रहरी चौकी चौकीटोलबाट खटिएको टोलीले नियन्त्रणमा लिएको हो ।
ना ६ त ५३९३ र ना ६ त ६७८२ नंबरको ट्याक्टरहरुमा अवैध रुपमा नदीजन्य लोड गरेको र नियमानुसारको कर छली गरी ओसार पोसार गर्दै गरेको अवस्थामा पक्राउ गरिएको जिल्ला प्रहरी कार्यालय मकवानपुरका प्रहरी नायब उपरिक्षक नरेशकुमार सिंहले बताए ।
नियन्त्रणमा परेका २ ट्याक्टरलाई आवश्यक कारबाहीको लागि जिल्ला समन्वय समितिको कार्यालय मकवानपुरमा पठाईएको र प्रत्येकलाई रु ५,००० का दरले जरीवाना गरी छाडीएको मकवानपुर प्रहरीले जनाएको छ ।