नागरिक वडा मञ्च हेटौँडा १२ घरेडी डाँडा रमन्टारको आयोजनामा हेटौँडा १२ मा सडक सरसफाई गरिएको छ । मंगलबार एक कार्यक्रमका बिच स्थानीयहरुको सहभागितामा बाटो सरसफाई गरिएको रमन्टारबाट स्थानीय विकास ब्लोनले जानकारी दिएका छन् ।

बर्खाको समयमा बाटो वरपर बढेका झार फँडानी गर्नुका साथै बाटो वरपर भएका रुखका हाँगाहरु समेत कटान गरिएको हो । ‘हामीले बाटो वरपरको झाडी फँडानी गर्नुका साथै बाटोमा अवरोध पुराउन सक्ने किसिमका केराका बोटहरु र बाँसका झाङहरु छाँटेका छाँै’, सरसफाईमा सहभागी सन्त मोक्तानले भने, ‘टोलवासीहरुको समेत सहभागिता रहेकोले सरसफाई गर्न सजिलो भयो ।’

घरेडी डाँडादेखि माथिल्लो रमन्टारसम्म बाटो सरसफाई गर्ने क्रममा मञ्चका अध्यक्ष मानबहादुर गोले, स्थानीय विकास ब्लोन, सन्त मोक्तान, मिलन मोक्तान, शान्तिमाया ब्लोन, सुन्तली गोले, सुर्जे मोक्तान, राजु सिन्तान, श्रीराम तिवारी सहित अन्य टोलवासीहरुको उल्लेख्य रुपमा सहभागिता रहेको थियो । मञ्चका अध्यक्ष गोलेले आगामि दिनहरुमा पनि यसरी नै समाजमा विविध कार्य गरेर अगाडि बढ्ने बताए । टोलको विकासका लागि एक भएर अगाडि बढ्ने र स्थानीयहरुको रोहोबरमा समाज विकासका विभिन्न कार्य गर्ने योजना रहेको उनले बताए ।